بمناسبة اليوم العالمي للاعاقة ، أهدي هذه القصيدة باللهجة العامية اللبنانية لغة القلب والروح والوجدان الى الانسان القابع في كل فرد من أفراد العائلة البشرية ، لأن هذه الإعاقة تطال كل انسان منا بشكل من الأشكال أو بصورة من الصور، وما عليه للتأكد من صحة ما أقوله الا أن يختلي بنفسه ويعريها بغاية إظهار أو تبيان محل الإعاقة فيها٠٠٠
الإعاقة يا بشر منها بجسدنا
ولا بتشويه حسن اللي نحسدنا
عليه من النجوم العم تلالي
وبدر المن نوافذنا قصدنا
الإعاقة بفكر فارغ لامبالي
بينكر فضل جمعتنا واحدنا
الإعاقة بعقل متكاسل وخالي
من إشعاع اللي بفضلو نوجدنا
الإعاقة بقلب جوفو الحقد مالي
ما بيحب رب اللي عبدنا
اسمو يكون مبني عالعدالي
وعا ركبي ونص قدامو سجدنا
الإعاقة بروح مضيت كمبيالي
مع عزريل ساعة ما ولدنا
تا تقضي عا جسدنا بالوكالة
عن ابليس اللى بسوطو نجلدنا
الإعاقة بنفس عم تنكر أصالي
نعكست عن الذات بمعتقدنا
الإعاقة تسيطر علينا الجهالي
حتى بجهلنا ندمر بلدنا
الإعاقة عالارض نهمل رسالي
فيها للفرج شفنا سندنا
الإعاقة نشلح ببير الجهالي
ولدنا اللي متل يوسف ونرجع
بعين يعقوب نبكي عا ولدنا
يوسف الدباك جعجع/ لبنان٠٠٠
